| Zenbait
film labur egin ondoren, John Carpenterrek bere lehenengo film luzea egiteari
ekin zion. Pelikula amaitzeko hiru urte baino gehiago behar izan zituen,
eta aurrekontu txikiarekin, protagonista gisa lau lagun hartuta (horietako
bat Dan O’Bannon, gerora Alien, el octavo pasajero-ren
gidoigilea izango zena) eta eszenario bakar batekin, Dark Star
(Espainian Aluniza como puedas izenburuaz ere ezagutzen
dena) kanpoaldeko espazioan girotuta dagoen oso pelikula dibertigarria
eta eldarniozkoa egin zuen, astronauta batzuei buruzkoa. Beren eginkizuna
planeta ezegonkorrak suntsitzea da, haien lanaz hitz egin eta hausnartzen
duten bonba adimendun batzuez baliatuz. Carpenterren debuta beti izango
dugu gogoan ontziko tripulatzaileetako baten eta estralurtar baten arteko
borrokaren sekuentziagatik, estralurtarraren itxura hauxe izanik…
hondartzako baloi batena. |
