| Eta
odola gorri bihurtu zen. Terence Fisherrek, Hammer etxeko maisuak, kolorez
tindatu du konde legendarioak edaten duen odola. Lugosi eta Browningen
zuri-beltza odolaren gorri bihurtuta, pasioaren gorri, heriotzaren gorri,
desioaren gorri, bizitzaren gorri. Christopher Leek Drakula desorekatuagoa
sortu du, sutsuagoa, biziagoa, hungariarrak sortutakoaren aldean (hala
eta guztiz ere benetako Drakula bihurtu ez arren, Lugosiri gertatu ez
bezala). Peter Cushing, beti bezala, van Helsing da. Hemen bere lehenengo
abenturan agertzen zaigu, Trantsilvaniako noblearekin izandako bere lehenengo
borrokan, bere lehenengo garaipenean, ondoren beti suntsituta bukatu arren;
itzuli egin baita kondea, ez baita hilko, pelikula gehiago egongo baitira,
edo kondea ez bada haren semea, alaba… izango da. |
