| Bizitasun
handiko Repulsión eta Cul-de-sac
ondoren, Roman Polanski errealizadore poloniarrak atsedenaldi bat hartu
zuen eta banpiroen komedia dibertigarri eta eldarniozko hau zuzendu zuen,
umorea eta beldurra berdintsu nahasten dituena eta bera izanik bertan
protagonistetako bat. Pelikula honek Estatu Batuetara eraman zuen Polanski.
El baile de los vampiros-en, Abronsius irakaslearen laguntzailearen
pertsonaia antzezten du, Alfred, nagusiarekin batera Trantsilvaniara joango
dena, banpiroen bila. Eta bilatu egingo ditu, jakina. Eta dantza egingo
dute gainera, eta Sharon Tatek behin baino gehiagotan bainu hartuko du
eta otsoak uluka arituko dira eta odola elurretik isuriko da eta betortzak
argitara aterako dira, eta denek primeran pasako dute. |
