| Erotasunaren
ahoan. Guztia eroetxe batean hasten da. Sam Neill bertan dago sartuta.
Zergatik jakin nahi badugu, pelikula ikusi behar dugu, bertan kontatzen
zaigun istorioa entzun, eta Sutter Cane munduan gehien irakurtzen diren
nobelen idazlea dela jakin. Kontua da Cane desagertu egin dela eta Samek
aurkitu beharko duela Charlton Hestonen eskariz, existitzen ote den, Macondo
edo Yoknapatawpha edo Unbria ote den ez dakien herri batean. Eta komeni
da idazlea laster aurkitzea, haren irakurleek ezin baitute gehiago itxaron
idazten ari zen nobela eta kasualitatez Beldurraren ahoan edo
Erotasunaren ahoan izenburua zuena (pelikula jatorrizko bertsioan
edo bikoiztutakoan ikusi izan bada) irakurri gabe, eta urduri daude eta
arrotz jokatzen ari dira. Literaturaren eta zinemaren infernuetara egindako
jaitsiera, batzuetan errealak? baino askoz ere errealagoak diren infernu
horietara. |
