Fantômas (1913-1914). Louis Feuillade. Francia. 5 atal: Fantômas (À l’ombre de la guillotine) (1913. 54 minutu), Juve contre Fantômas (1913. 59 minutu), Le mort qui tue (1913. 90 minutu), Fantômas contre Fantômas (1914. 59 minutu), Le faux magistrat (1914. 70 minutu)

Louis Feuillade frantsesak, sailen maisuak, Europako zinemaren aitzindarietako bat eta 800 pelikula baino gehiagoren egilea izanik, 1913 eta 1914 urte bitartean lehen aldiz eraman zituen zinemara Fantômasen abenturak. 1912an Marcel Allain eta Pierre Souvestrek sortutako pertsonaia (Fantômus izenez bataiatu zuten, baina editorearen miopiak eraginda hartu zuen bere behin betiko izena), frakez jantzita eta begietan mozorro bat duela, XX. mendean nobela ugariren eta hainbat pelikularen protagonista izan den lapur dotorea da. Sortu zenetik urtebetera, Feuilladek zuzendutako bost emanaldiko sail honetan agertu zen Fantômas, René Navarre aktoreak antzeztua, oraingo honetan bihotz oneko alproja gisa, eta bere lagun amorratua, Juve inspektorea ondoan duela.