Sang froid
(2003). Pierre-Louis Levacher. Francia. 6 minutu
Txiki-txikitandik (edo ez hain txikitandik, gurasoek Chicho Ibáñezen telebistako programak eta beldurrezko pelikulak ikusten utzi baziguten edo uzten badigute, horren arabera) erakutsi ohi digute noizbait banpiroren bati aurre egin behar badiogu baratzuriak, hesolak, ur bedeinkatua, gurutzeak (edo gurutze forma duen edozein gauza, Peter Cushingek ondo zekien bezala), eguzki argia… erabili behar ditugula. Banpiro talde batek erasotako gizona babes bila dabil eliza batean, Kristoren oinetan, gurutze santuaren babesean. Baina zer gertatzen da zinemak egia esan ez badigu? Zer gertatuko litzateke gauzak Browningek, Fisherrek eta halakoek kontatu zizkiguten bezalakoak ez balira? Komedia digitala, umore ukituaz banpirismoaren eta kristautasunaren arteko loturei buruzko hausnarketa egiten duena.