Beldurrezko Zinemaren 35. Asteko Gazteen Epaimahaian parte-hartzeko epea zabalik dago

2024.09.23

Hemeretzigarren urtez jarraian, Donostia Gazteriak Fantasiazko eta Beldurrezko Zinemaren Astean parte hartu eta Gazteen Epaimahaia eratuko du; 100 pertsonekin osaturiko taldeak film laburren irabazlea aukeratu eta 35. edizioko Film Laburrik Onenaren Gazte Saria emango du. Interesatuek Gazteriako webgunearen bidez izena eman dezakete urriaren 11ra arte.

Gazteen Epaimahaian parte hartzeko aukeratzen diren gazteak (100 pertsona) Victoria Eugenia Antzokian elkartuko dira urriaren 25ean, arratsaldeko lauretan, aurkeztuko diren film laburrak ikusi eta baloratzeko. Emanaldiaren ondoren, epaimahaikide bakoitzak bere botoa eman beharko du, eta, emaitzaren arabera erabakiko da zeinek irabaziko duen Fantasiazko eta Beldurrezko Zinemaren 35. Asteko Film Laburrik Onenaren Gazte Saria. Gainera, epaimahaiko bi pertsona hautatuko dira saria banatzeko.

18-30 urte bitarteko gazteek parte hartu ahal izango dute eta diren tokiak (100) baino eskari gehiago izanez gero, Donostian erroldatuta daudenek izango dute lehentasuna; beharrezkoa balitz, zozketa egingo litzateke. Zozketaren ondoren, hautatuek urriaren 25eko emanaldira etorriko direla baieztatu beharko dute; bestela, itxaron zerrendara joko da epaimahaia osatzeko.

Bestalde, epaimahaiko kide guztiek 35. Beldurrezko eta Fantasiazko Asteko zenbait emanaldietara joateko aukera izango dute. Emanaldiak komunikatuko dira urriaren 25eko saioan.

Izen ematea eta ezarritako epeak

Izena emateko Donostia Gazteriako webgunean (www.donostia.eus/gazteria) izena emateko fitxa bete. Era berean, esteka horretan, zozketaren emaitzak ikusi ahal izango dira, eta hautatutako gazteek etorriko direla baieztatu ahal izango dute.

Ezarritako epeak, honako hauek dira:

Izen emate epea: irailaren 23tik urriaren 11 bitartean (biak barne)
Zozketa eguna: urriaren 15ean
Hautatuak izan diren pertsonek parte hartuko dutela baieztatzeko epe muga: urriaren 21a
Emanaldiaren eguna: urriaren 25a, 16:00etatik aurrera, Victoria Eugenia Antzokian

Bestelako informazioa eta harremana:

Donostia Gazteria
943 48 19 09
gazteria@donostia.eus